પુર્વાભાસ પોતાનો…
      એ અવાજની પાછળ…
કંઈ અમથો નઈ હોય..

સવાલ જવાબ વગરનો …
        એ સંવાદ…
કંઈ અમથો નઈ હોય….

વાંછટ આવે નહી …
     તોય.. છાંટા સુકાય નહી....
એ….તડકાનો વરસાદ…
     નિરાધાર…..
કંઈ અમથો નઈ હોય….

                    મિત્તલ પટેલ
                    “પરિભાષા”

હું મસ્ત મજાનું બાળ..

હું મસ્ત મજાનું બાળ ,
     મને રમવાનું જોઈએ…

ચાંદા સૂરજ સંગ મને,
        ભમવાનું જોઈએ…

પતંગિયા પેઠે આમતેમ …
        ઉડવાનું જોઈએ…

હું મસ્ત મજાનું બાળ,
        મને રમવાનું જોઈએ..

છાનું માનું બેસું તો,
       કરમાઈ જાઉં હું….

ધમાલમસ્તી કરું તો,
         ખીલી ખીલી જાઉં હું…

દેડકાંની પેઠે મને ,
       કુદવાનું જોઈએ….

હું મસ્ત મજાનું બાળ,
     મને રમવાનું જોઈએ…

ચોપડાં ને ટ્યુશન માં
        ડબોચાઈ જાઉં હું…

ભણતરનાં ભાર થી
          નમી નમી જાઉ હું….

ખડખડાટ ફુલ સમ,
          હસવાનું જોઈએ….

ખુલ્લાં મને ભાર વગર ,
ભણવાનું જોઈએ….

            મિત્તલ પટેલ
            “પરિભાષા”

   

સમ-વેદનાં વેદ....

આમ જુઓ તો
       સઘળું તારું એ મારું છે…
મારામાં તારું ,પણ ક્યાં તારામાં મ્હારું છે…!!

વિનવી શકાય પણ,
        ન છેતરી શકાય જાતને…..
સારું એ જ મારું પણ “મ્હારું”ય ક્યાં સારું છે…..!!

ગુણોત્તર ગુણીને જવાબ લાવી દઈએ..
ચલ તારાં હાથે જ આજ નિકાલ લાવી દઈએ..

આમ જુઓ તો સીધા રસ્તે
             રસ્તોય ક્યાં સીધો છે….
વળાંકોમાં વળાંક ..ને..
               એ  વળાંકમાંય હા વળાંક છે…!!

સમ-વેદનાં વેદ ભરી રાખી છે
                  એક વાડકી…
સ્વાર્થની આ થાળીમાં તે વાડકીને ક્યાં ભાળી છે..!!

                                             મિત્તલ પટેલ
                                              “પરિભાષા”

પાનખરનાં વળામણાં...

પાનખરમાં પાનનાં ..
         વળામણાને જોને…

તું જ સંવેદી શકે…
         તે રિસામણાને જોને….

પવનથી નહી…
         હવે ડાળીને લાગ્યો છે ભાર…
સંગાથ છુટતા …
       હવે જોડાણનો તુટ્યો છે તાર…

પાદડાં ખરે એ નહી..
     એ બુઠ્ઠા ઝાડવાંને જોને…

છાયડો નથી જેનો…
      એ ઉભા પહાડ ને જોને…

શ્યામ વગર વાંસળી,
       લઈ ઉભેલ રાધાને જોને…

સાવ ઉજ્જડ વેરાન,
     એવાં એ મનડાને જોને…

             મિત્તલ પટેલ
              “પરિભાષા”
              અમદાવાદ

રંગહીન સંવાદ

રાતી-પીળી થતી જીંદગી…
     રંગહીન સંવાદ એક શોધતી જાય…

વિના ગળપણ ને વિના મેળવણનો
      આસ્વાદ ભાવનો ઘોળતી જાય…

કૃત્રિમતાનો હાર દૂર ફગાવી….
     “ સહજાનંદ”ને મમળાવતી જાય….

રાતી-પીળી થતી જીંદગી….
      રંગહીન સંવાદ એક શોધતી જાય…

ક્યાં છે ઠોકર !!
      ક્યાં છે પીડા!!
ભેખડો તો ભીતરમાં છે…

ભીંત હટાવી ભાળીએ જો સૌને
     એ અભીત વ્યવહાર શીખવાડતી જાય….

ખોટેખોટા આભાસ બતાવી…
     શાશ્વત ને બતલાવતી જાય….

રાતી-પીળી થતી જીંદગી..
      રંગહીન સંવાદ એક શોધતી જાય.

                             મિત્તલ પટેલ
                              “પરિભાષા”
                               અમદાવાદ

ફૂટેલું અજવાળું....

અંધારામાં કોડિયું કરવાં....
       જાતે અહીં મથવું પડે છે...

અસિમિત તકલીફોમાંય...
        જીવતેજીવ ઝઝુમવુ પડે છે..

વ્યક્તિવિશેષ કે સંજોગોવશાત.....
         કંઈ ખાસ નથી હોતું સમયથી વિશેષ....

ખાણાખોપચામાં છુપાયેલ...
         એ સાચાં ભાવને શોધવો પડે છે...

વહેમ લાગે કે વળગણ હરપળ...
        " જુગાર" હરરોજ એક જ રમવો પડે છે...

"તું નથી તારાં માં" ... જોને...
           તોય તારામાં જ તને શોધવો પડે છે....

વખતોવખત "મ્હારુ" બનીને...
          મહિયરમાં મહીપતને.... ખોળવુ પડે છે....

ક્યાંક ફૂટેલું અજવાળું જોવા....
        અંધારામાં ડોકિયું રોજ કરવું પડે છે....

                   મિત્તલ પટેલ
                   "પરિભાષા"
                  

         

રંગોત્સવ

સાદ આપે, વાદ આપે
          સંવાદ આપે આ રંગોત્સવ…..

રંગોની ભીતર મનનું
           રંગરોગાન આપે આ રંગોત્સવ…

સ્વ -અર્થના સ્વાર્થ સાથે…..
             ભળી જાય ઉપરંગ બધા….

રાતી રાતી આ જીવનપાળીમાં….
              લાલી આપે આ રંગોત્સવ….

ક્યાં અહમ છે,
       ક્યાં છે ભરમ…..
એક મંચ પર નાચે સંગ બધાં….

દીવાલ તોડી અહમની …
         અહા! સહજ આનંદ કરાવે આ રંગોત્સવ…….

          મિત્તલ પટેલ
          “પરિભાષા”